PAGSULAT NG TALUMPATI

Ang impormatibong talumpati na ito ay tungkol sa pagpapayaman ng kultura at wikang Filipino sa panahon ng ASEAN Integration.

PAGYAMANIN

Magandang umaga sa inyong lahat. Alam ko na marami sa atin ay may gustong lumibot sa ibang bansa upang makakita ng magagandang tanawin o kaya naman makakain ng masasarap na pagkain. Ang iba naman ay gustong magtrabaho o mag-aral sa ibang bansa dahil sila ay nakakakita ng mas malaking oportunidad. May mga kakilala tayong mga tao o kamag-anak na nakaranas na nito. Lahat ng ito ay posible dahil sa integrasyon ng mga malalapit na bansa sa atin. Ito ay tinatawag na ‘ASEAN Integration’. Sa panahon ngayon, hindi na bago sa atin ito dahil madaming Pilipino na ang nasa ibang bansa at madami ring banyaga ang nandito na sa Pilipinas. Naniniwala ang mga banyaga na likas sa kultura at wika ang Pilipinas kaya sila bumisita o lumipat dito. Ano nga ba ang natutulong natin at naitutulong sa atin ng ASEAN Integration?

Ang ASEAN o Association of Southeast Asian Nations ay ang pagsama-sama at pagtutulungan ng mga bansang nasa Southeast Asia. Ang mga bansang Indonesia, Malaysia, Singapore, Thailand, Brunei Darussalam, Vietnam, Laos, Myanmar, Cambodia, at Pilipinas ay kabilang sa samahan na ito. Ang layunin ng samahan na ito ay upang mapaunlad ang mga bansa pati na rin ang ekonimiya rito. Naisipan nila na mas mabuti na magtulungan sila at magkaisa para sa kaunlaran ng kanilang bansa. Epektibo naman ito ngayon dahil marami sa ating mga Pilipino ang lumilipat sa mga bansa na kabilang dito at may lumilipat din naman na mga banyaga rito na galing sa mga bansang iyon. Marami rin sa atin na ninanais na makapag-aral sa ibang bansa o kaya naman makabisita man lang sa mga ito. Ganunpaman, marapat na mapatibay at makilala pa lalo ang ating kultura at wika kahit na may mga oportunidad sa ibang bansa. Maaari itong magsimula sa ating mga Pilipino dahil ito ay pinagkatiwala sa atin ng ating mga ninuno at patuloy pa rin natin itong ginagawa sa kasalukuyan na panahon. Importante na pagyamanin natin ang mga ito dahil ito rin ay isang paraan para makilala tayo ng ibang tao sa ibang bansa. Ang patuloy na paggamit natin sa wikang Filipino pati na rin sa ibang mga dayalekto ay makakatulong para mapatibay ang ating wika. Ang kultura naman natin na kinabibilangan ng arkitektura, relihiyon, pagpipinta, musika, sayaw, literatura, pagkain, edukasyon, pista, at marami pang iba ay dapat nating pahalagahan dahil ang mga ito ay makakatulong sa atin upang makilala tayo ng ibang bansa at mapaunlad din ang ating ekonomiya.

Ang lahat ng ito ay dapat mabigyan ng halaga dahil kung wala ang mga ito ay parang wala na rin ang Pilipinas. Ito ang nagbibigay sa atin ng pagkakakilanlan bilang isang bansa. Kahit na maraming bansa ang puwedeng paglipatan dahil sa tulong ng ASEAN Integration, huwag pa rin natin kalimutan ang bansa kung saan tayo nanggaling at lumaki. Patuloy natin pagyamanin ang ating wika at kultura hindi lamang para sa ikabubuti ng bansa, kundi pati na rin sa mga Pilipino sa loob o labas man ng ating bansa. Maraming salamat at magandang araw sa inyong lahat.